ఎన్‌టీఏలో ఆపరేషన్స్‌ అసిస్టెంట్‌ ఉద్యోగాలు

భారత ప్రభుత్వ విద్యా మంత్రిత్వ శాఖ పరిధిలోని నేషనల్ టెస్టింగ్ ఏజెన్సీ (ఎన్‌టీఏ), ఒప్పంద ప్రాతిపదికన బైలింగ్వల్‌ టైపిస్ట్, ఆపరేషన్స్ అసిస్టెంట్ పోస్టుల భర్తీకి నోటిఫికేషన్ విడుదల చేసింది.

వివరాలు:

బైలింగ్వల్‌ టైపిస్ట్‌ అండ్‌ ఆపరేషన్స్ అసిస్టెంట్: 12 పోస్టులు (అస్సామీ, బెంగాలీ, గుజరాతీ, హిందీ, కన్నడ, మలయాళం, మరాఠీ, ఒడియా, పంజాబీ, తమిళం, తెలుగు, ఉర్దూ భాషల్లో ప్రతి భాషకు ఒక ఖాళీ చొప్పున).

అర్హత: అభ్యర్థులు ఏదైనా గుర్తింపు పొందిన బోర్డు నుంచి 12వ తరగతి (ఇంటర్మీడియట్) లేదా తత్సమాన పరీక్ష ఉత్తీర్ణులై ఉండాలి. నిర్దేశించిన 13 భాషల్లో (ఇంగ్లిష్, హిందీ, తెలుగు, అస్సామీ, బెంగాలీ, గుజరాతీ, కన్నడ, మలయాళం, మరాఠీ, ఒడియా, పంజాబీ, తమిళం, ఉర్దూ) రెండు భాషలలో చదవడం, రాయడం, టైపింగ్ ప్రావీణ్యం ఉండాలి. అందులో ఒక భాషను ప్రాథమిక భాషగా ఎంచుకోవాలి. రెండు భాషలలో నిమిషానికి 40 కంటే ఎక్కువ పదాల (WPM) టైపింగ్ వేగం, 90% కంటే ఎక్కువ ఖచ్చితత్వం ఉన్నట్లు తగిన ఆధారాలు కలిగి ఉండాలి. ఇంగ్లిష్ టైపింగ్ ప్రావీణ్యం లేనివారు చేరిన 6 నెలల్లోపు ఆ నైపుణ్యాన్ని సాధించాల్సి ఉంటుంది. ఎంఎస్‌ ఆఫీస్‌, పీడీఎఫ్‌ నిర్వహణ, ప్రూఫ్‌రీడింగ్ నైపుణ్యాలు ఉన్నవారికి ప్రాధాన్యత ఉంటుంది.

వయోపరిమితి: 21 నుంచి 62 ఏళ్ల మధ్య ఉండాలి.

వేతనం: నెలకు రూ.75,000.

ఎంపిక విధానం: దరఖాస్తుల పరిశీలన ఆధారంగా అభ్యర్థులను షార్ట్‌లిస్ట్ చేస్తారు. షార్ట్‌లిస్ట్ అయిన అభ్యర్థులకు ఎన్‌టీఏ ప్రాంగణంలో ప్రాక్టికల్ స్కిల్ టెస్ట్/లేదా ఇంటర్వ్యూ నిర్వహిస్తారు. ఈ ప్రాక్టికల్ పరీక్షలో టైపింగ్ వేగం, ఖచ్చితత్వం, కంప్యూటర్ నైపుణ్యాలు, డాక్యుమెంట్ ప్రాసెసింగ్ సామర్థ్యాన్ని పరిశీలిస్తారు.

దరఖాస్తు విధానం:

నోటిఫికేషన్‌లోని Annexure-I లో ఇచ్చిన దరఖాస్తు ఫారమ్‌ను పూర్తి చేసి, అవసరమైన అన్ని సర్టిఫికెట్‌ల (విద్యార్హత, టైపింగ్ వేగం, గుర్తింపు కార్డు మొదలైనవి) స్వయం ధ్రువీకరణ ప్రతులను జత చేసి dir-admin@nta.gov.in ఈమెయిల్ ఐడీకి పంపాలి. ఈమెయిల్ సబ్జెక్ట్‌లో మీరు దరఖాస్తు చేసుకుంటున్న ప్రాథమిక భాషను స్పష్టంగా పేర్కొనాలి.

పరీక్ష రుసుము ఫీజు: ఎటువంటి దరఖాస్తు లేదా పరీక్ష రుసుము లేదు.

చివరి తేదీ: 16/09/2026.

Website: https://nta.ac.in/