ఆల్బర్ట్ ఐన్‌స్టీన్

జి.ఎన్‌.రామచంద్రన్‌

ఈయన భారతదేశానికి చెందిన ప్రముఖ భౌతిక, అణు జీవభౌతిక శాస్త్రవేత్త (molecular biophysicist). ప్రోటీన్‌ నిర్మాణం, అణువుల స్వరూపాన్ని అర్థం చేసుకోవడంలో రామచంద్రన్‌ పరిశోధనలు ఎంతగానో తోడ్పడ్డాయి. ప్రోటీన్‌ నిర్మాణాలను చిత్రీకరించడానికి ‘రామచంద్రన్‌ ప్లాట్‌’ను అభివృద్ధి చేశారు. కొల్లాజెన్‌ ‘ట్రిపుల్‌ హెలికల్‌ నిర్మాణాన్ని’ నిర్ధారించారు. భౌతికశాస్త్రం, రసాయనశాస్త్రం, జీవశాస్తాల్రను అనుసంధానించి అణు జీవభౌతికశాస్త్రంలో చేసిన ప్రయోగాలు ఆయనకు ప్రపంచవ్యాప్త గుర్తింపును తెచ్చాయి. పోటీపరీక్షల నేపథ్యంలో రామచంద్రన్‌ గురించిన ముఖ్య విశేషాలు తెలుసుకుందాం..!

బాల్యం - వృత్తి జీవితం

అసలు పేరు గోపాలసముద్రం నారాయణన్‌ రామచంద్రన్‌. 1922, అక్టోబరు 8న ఎర్నాకుళం (కేరళ)లో జన్మించారు. పాఠశాల విద్యను అక్కడే పూర్తి చేశారు.
1936లో ఇంటర్మీడియట్‌ చదివేందుకు ఎర్నాకుళంలోని మహారాజా కళాశాలలో చేరారు. మొదట్లో ఆయనకు గణితంపై ఎక్కువ ఆసక్తి ఉండేది, క్రమంగా ఫిజిక్స్‌ వైపు ఆకర్షితులయ్యారు. 1938లో ప్రథమ స్థానంలో ఉత్తీర్ణులయ్యారు. తర్వాత భౌతికశాస్త్రంలో బీఎస్సీ (ఆనర్స్‌) చేసేందుకు తిరుచినాపల్లిలోని సెయింట్‌ జోసెఫ్‌ కాలేజీలో చేరారు. 1942లో డిగ్రీ పట్టా పొందారు.
1942లో బెంగళూరులోని ఇండియన్‌ ఇన్‌స్టిట్యూట్‌ ఆఫ్‌ సైన్స్‌లో (ఐఐఎస్‌సీ) ఎలక్ట్రికల్‌ ఇంజినీరింగ్‌ విభాగంలో చేరారు. ఆ సమయంలో ప్రముఖ ఫిజిక్స్‌ శాస్త్రవేత్త, నోబెల్‌ పురస్కార గ్రహీత (1930) సీవీ రామన్‌ అందులో భౌతికశాస్త్ర అధ్యాపకుడిగా ఉన్నారు. ఆయన పర్యవేక్షణలో మాస్టర్స్, డాక్టరేట్‌ చేసే ఉద్దేశంతో రామచంద్రన్‌ ఫిజిక్స్‌ విభాగంలోకి మారారు. 1944లో ఫిజిక్స్‌లో మాస్టర్స్‌ డిగ్రీ, 1947లో డాక్టరేట్‌ పట్టా అందుకున్నారు. అదే సమయంలో ఆయనకు రాయల్‌ కమిషన్‌ ఫర్‌ ది ఎగ్జిబిషన్‌ 1851 స్కాలర్‌షిప్‌ లభించింది. దాని సాయంతో ఆయన 1947లో కేంబ్రిడ్జ్‌లోని కావెండిష్‌ ల్యాబొరేటరీలో చేరి, అక్కడ తన పరిశోధనలు కొనసాగించారు.
1949లో భారత్‌కు తిరిగి వచ్చి బెంగళూరులోని ఐఐఎస్‌సీలో భౌతికశాస్త్ర విభాగంలో సహాయ ఆచార్యుడిగా చేరారు.
1952లో మద్రాస్‌ యూనివర్సిటీలో భౌతికశాస్త్ర విభాగ అధిపతిగా చేరేందుకు వెళ్లారు. 1970 వరకు అందులోనే పనిచేశారు.

ముఖ్యమైన పరిశోధనలు..

ఆయన ప్రయోగాత్మక ఎక్స్‌-రే క్రిస్టలోగ్రఫీ, ప్రోటీన్‌ కెమిస్ట్రీ, గణన పద్ధతులను ఉపయోగించి జీవ అణువుల ఆకృతిపై ప్రయోగాలు నిర్వహించారు.
1954లో గోపీనాథ్‌ కర్తతో కలిసి ఆయన కొల్లాజెన్‌ నిర్మాణాన్ని ఆవిష్కరించారు. ఇందుకోసం ట్రిపుల్‌ హెలికల్‌ నమూనాను ప్రతిపాదించారు.
ప్రోటీన్‌లోని అమైనో ఆమ్లాల నిర్మాణాలను దృశ్యమానం చేసేందుకు, ధ్రువీకరించేందుకు 1963లో ఒక 2డీ రేఖాచిత్రాన్ని అభివృద్ధి చేశారు. దానికే రామచంద్రన్‌ ప్లాట్‌ అని పేరు.

పురస్కారాలు - గౌరవాలు

1961లో భౌతికశాస్త్రంలో శాంతి స్వరూప్‌ భట్నాగర్‌ అవార్డు అందుకున్నారు.
ప్రోటీన్, పాలిపెప్టైడ్‌ నిర్మాణంపై చేసిన పరిశోధనలకు 1968లో జవహర్‌లాల్‌ నెహ్రూ ఫెలోషిప్‌ పొందారు.
1971లో ఆసియాటిక్‌ సొసైటీ నుంచి మేఘనాథ్‌ సాహా పతకం అందుకున్నారు.
1972లో ఇండియన్‌ సైన్స్‌ అకాడమీ నుంచి సర్‌ సి.వి.రామన్‌ మెడల్‌ పొందారు.
1977లో రాయల్‌ సొసైటీ ఫెలోగా నియమితులయ్యారు.
1981లో ఏర్పాటైన ‘ప్రపంచ సాంస్కృతిక మండలి’ వ్యవస్థాపక సభ్యుల్లో రామచంద్రన్‌ ఒకరు.
1999లో ఇంటర్నేషనల్‌ యూనియన్‌ ఆఫ్‌ క్రిస్టలోగ్రఫీ ఈయనకు ఎవాల్డ్‌ ప్రైజ్‌ను ప్రదానం చేసింది.

చివరగా..

ప్రాణులకు ఎంతో ముఖ్యమైన ప్రోటీన్ల ప్రాథమిక నిర్మాణాన్ని వివరించడంలో రామచంద్రన్‌ పరిశోధనలు ఉపయోగపడ్డాయి. మెడిసిన్, బయోకెమిస్ట్రీ, స్ట్రక్చరల్‌ బయాలజీ అభివృద్ధికి ఆయన ఎంతగానో తోడ్పడ్డారు. జీవశాస్త్ర రంగంలో ఆయన చేసిన కృషికి కౌన్సిల్‌ ఆఫ్‌ సైంటిఫిక్‌ అండ్‌ ఇండస్ట్రియల్ రిసెర్చ్‌ (సీఎస్‌ఐఆర్‌) 2004లో ‘జీఎన్‌ రామచంద్రన్‌ గోల్డ్‌ మెడల్‌ ఫర్‌ ఎక్సలెన్స్‌ ఇన్‌ బయోలాజికల్‌ సైన్సెస్‌ అండ్‌ టెక్నాలజీ’ పతకాన్ని నెలకొల్పింది. ఈయన 2001, ఏప్రిల్‌ 7న చెన్నైలో మరణించారు.

గత పరీక్షల్లో అడిగిన ప్రశ్నలు

1. ‘మద్రాస్‌ స్కూల్‌ ఆఫ్‌ కన్ఫర్మేషనల్‌ అనాలసిస్‌ ఆఫ్‌ బయోపాలిమర్స్‌’ వ్యవస్థాపకులు ఎవరు?

(డీఎస్‌ఎస్‌ఎస్‌బీ పీడీజీ బయాలజీ, 2021)

1) హె.జి.ఖొరానా 2) అన్నామణి

3) ఎస్‌.ఎస్‌.భట్నాగర్‌ 4) జి.ఎన్‌.రామచంద్రన్‌

సమాధానం: 4

2. కొల్లాజెన్‌ అనేది ఒక రకమైన...

(ఎస్‌ఎస్‌సీ సీజీఎల్‌ టైర్‌-1, 2020)

1) కొవ్వు 2) విటమిన్‌

3) ప్రోటీన్‌ 4) కార్బోహైడ్రేట్‌

సమాధానం: 3

3. Which of the following was discovered by GN Ramachandran?
(SSC Selection Post 2024)