అంతర్జాతీయ ధ్రువపు ఎలుగుబంటి దినోత్సవం

పర్యావరణ కాలుష్యం వల్ల మానవాళితోపాటు అనేక ఇతర జంతువులు ప్రభావితమవుతున్నాయి. అలా నష్టపోతోన్న జాతుల్లో ధ్రువపు ఎలుగుబంటి ఒకటి. ఇటీవలి కాలంలో వీటి జనాభా వేగంగా క్షీణిస్తోంది. ధ్రువ ప్రాంతాల్లో మంచు కరగడం, వాతావరణ మార్పుల వల్ల వేగంగా తరిగిపోతోన్న ధ్రువపు ఎలుగుబంట్లను రక్షించే లక్ష్యంతో ఏటా ఫిబ్రవరి 27న ‘అంతర్జాతీయ ధ్రువపు ఎలుగుబంటి దినోత్సవం’గా (International Polar Bear Day) నిర్వహిస్తారు. వీటి సంరక్షణకు, అవి ఉండే ఆవాసాల పరిరక్షణకు తీసుకోవాల్సిన చర్యల గురించి ప్రపంచవ్యాప్తంగా అవగాహన కల్పించడం ఈ రోజు ముఖ్య ఉద్దేశం.

ధ్రువపు ఎలుగుబంటి - ముఖ్యాంశాలు

• దీని శాస్త్రీయ నామం ఉర్సస్‌మారిటిమస్‌ (Ursus maritimus). ప్రస్తుతం ఉన్న ఎలుగుబంటి జాతుల్లో అతి పెద్దది. దీన్ని సముద్ర క్షీరదంగా వర్గీకరించారు. ఇలా పరిగణించే ఏకైక ఎలుగుబంటి జాతి ఇదే.
• ఇవి ఉత్తర ధ్రువం చుట్టూ ఉన్న ఆర్కిటిక్‌ ప్రాంతాల్లో నివసిస్తాయి. ఇవి ప్రధానంగా గడ్డ కట్టే ఉష్ణోగ్రతల్లో జీవనం సాగిస్తాయి. ముఖ్యంగా సముద్ర మంచు తీరప్రాంతం కలిగిన కెనడా, అమెరికా (అలస్కా), రష్యా, గ్రీన్‌లాండ్, నార్వే (స్వాల్‌బార్డ్‌)లో ఇవి కనిపిస్తాయి.
• 40% కంటే ఎక్కువ ధ్రువపు ఎలుగుబంట్లు కెనడాలోని ఉత్తర ప్రాంతంలో నివసిస్తాయి.
• ఇవి మాంసాహార జంతువులు. ప్రధానంగా సముద్రాల్లో నివసించే సీల్స్‌ను వేటాడి తింటాయి.
• ఈ ఎలుగుబంట్లు దాదాపు 8 అడుగుల ఎత్తు, 300 నుంచి 700 కిలోల బరువు కలిగి ఉంటాయి. మొత్తం శరీర బరువులో 50% కొవ్వు ఉంటుంది. ఇదే వాటి శరీరానికి వెచ్చదనాన్ని ఇస్తుంది. ఆడ ధ్రువపు ఎలుగుబంట్లు శీతాకాలంలో పిల్లలకు జన్మనిస్తాయి. పుట్టినప్పుడు వాటి బరువు 700 గ్రాములు ఉంటుంది.

కాపాడుకోవాల్సిన ఆవశ్యకత

• పర్యావరణ సమతౌల్యాన్ని కాపాడటంలో ధ్రువపు ఎలుగుబంట్లు ముఖ్యపాత్ర పోషిస్తాయి. ముఖ్యంగా ఆర్కిటిక్‌ ప్రాంతంలో అత్యంత ముఖ్యమైన మాంసాహారుల్లో ఇవి ఒకటి. సీల్స్‌ను ఆహారంగా తీసుకోవడం ద్వారా వాటి జనాభాను అదుపులో ఉంచడానికి సహకరిసాయి. తద్వారా ఆహార గొలుసు, పర్యావరణ వ్యవస్థ ఆరోగ్యాన్ని కాపాడతాయి.
• ఇప్పటి వరకు శాస్త్రీయ పద్ధతిలో భూమిపై ఎన్ని ధ్రువపు ఎలుగుబంట్లు ఉన్నాయనే సర్వే జరగలేదు. ఎందుకంటే అవి చాలా తక్కువ ఉష్ణోగ్రతల్లో నివసిస్తాయి. అక్కడికి వెళ్లి వాటి గణన చేపట్టడం అసాధ్యం. పైగా అవి తెల్లటి రంగులో ఉంటాయి. మంచు ప్రదేశంలో అంతా ఒకే రంగులో ఉండటం వల్ల వాటిని లెక్కించడం కష్టమవుతోంది. 

చారిత్రక నేపథ్యం

• ప్రపంచవ్యాప్తంగా ధ్రువపు ఎలుగుబంట్ల సంతతిని రక్షించే లక్ష్యంతో 1992, జనవరిలో ‘పోలార్‌ బియర్స్‌ ఇంటర్నేషనల్‌’ అనే స్వచ్ఛంద సంస్థ ఏర్పాటైంది. మొదట ఇది కెనడా, అమెరికాలో కార్యకలాపాలు నిర్వహించగా తర్వాత రష్యా, గ్రీన్‌లాండ్, నార్వేలకు విస్తరించింది. భూమిపై ధ్రువపు ఎలుగుబంట్ల జాతి కొనసాగాలంటే గ్లోబల్‌ వార్మింగ్‌ను అరికట్టాలని ఈ సంస్థ నినదించింది. దీనిపై ప్రజల్లో విస్తృత అవగాహన కల్పించేందుకు ఒక రోజును ఏర్పాటు చేయాలని భావించింది. అందుకు అనుగుణంగా ఫిబ్రవరి 27న ‘అంతర్జాతీయ ధ్రువపు ఎలుగుబంటి దినోత్సవం’గా నెలకొల్పింది. 2011 నుంచి ప్రతి సంవత్సరం దీన్ని నిర్వహిస్తున్నారు. 

ప్రశ్న: అంతర్జాతీయ ధ్రువపు ఎలుగుబంటి దినోత్సవాన్ని ఏటా ఏ తేదీన నిర్వహిస్తారు?

(సీటీఈటీ సోషల్‌ స్టడీస్, 2017)

1) ఫిబ్రవరి 15   2) మార్చి 12

3) ఫిబ్రవరి 27   4) ఫిబ్రవరి 28

సమాధానం: 3

ప్రశ్న: ఆడ ధ్రువపు ఎలుగుబంట్లు ఏ కాలంలో జన్మనిస్తాయి? (ఏఎఫ్‌సీఏటీ, 2015)

1) వసంతకాలం     2) వేసవికాలం

3) శరదృతువు      4) శీతాకాలం

సమాధానం: 4

ప్రశ్న: వెచ్చదనం కోసం ధ్రువపు ఎలుగుబంట్లు వాటి చర్మం కింద ఏ పొరను కలిగి ఉంటాయి?

(ఎస్‌ఎస్‌సీ సీహెచ్‌ఎస్‌ఎల్, 2018)

1) కండరాలు    2) కొవ్వు

3) మృదులాస్థి  4) జుట్టు

సమాధానం: 2

Q. Identify the adaptive features in a polar bear (MP Police Constable, 2016)

1) A white fur, fat below the skin, keen sense of smell
2) Thin skin, large eyes, a white fur
3) A large body, curved sharp claws, large paws.
4) White body, paws for swimming, gills for respiration.

Ans: 1