ఆల్బర్ట్ ఐన్‌స్టీన్

వెంకీ రామకృష్ణన్‌

ఈయన భారత సంతతికి చెందిన అమెరికన్‌ జీవరసాయన శాస్త్రవేత్త. జీవశాస్త్రంలోని వివిధ విభాగాల్లో పరిశోధనలు చేశారు. రైబోసోమ్‌ల నిర్మాణం, పనితీరుపై అధ్యయనం చేశారు

ఈయన భారత సంతతికి చెందిన అమెరికన్‌ జీవరసాయన శాస్త్రవేత్త. జీవశాస్త్రంలోని వివిధ విభాగాల్లో పరిశోధనలు చేశారు. రైబోసోమ్‌ల నిర్మాణం, పనితీరుపై అధ్యయనం చేశారు. రైబోసోమ్‌లు అనేవి ఆర్‌ఎన్‌ఏ, ప్రోటీన్‌లతో తయారైన చిన్న కణాలు. ఇవి ప్రోటీన్‌ సంశ్లేషణలో ప్రత్యేకత కలిగి ఉంటాయి. ఆయన 30S రైబోసోమ్‌ సబ్‌యూనిట్‌ పరమాణు నిర్మాణాన్ని మ్యాపింగ్‌ చేశారు. ఇందుకుగానూ రసాయనశాస్త్రంలో నోబెల్‌ బహుమతి అందుకున్నారు. ఈయన పరిశోధనలు విజ్ఞానశాస్త్ర అభివృద్ధికి ఎంతగానో తోడ్పడ్డాయి. పోటీపరీక్షల కోణంలో వెంకీ రామకృష్ణన్‌ జీవితంలోని ముఖ్య విషయాల గురించి తెలుసుకుందాం..!

బాల్యం - వృత్తి జీవితం

పూర్తి పేరు వెంకటరమణన్‌ రామకృష్ణన్‌. 1952లో తమిళనాడులోని చిదంబరంలో జన్మించారు. పాఠశాల విద్యను బరోడాలోని కాన్వెంట్‌ ఆఫ్‌ జీసస్‌ అండ్‌ మేరీలో అభ్యసించారు.
1971లో భౌతికశాస్త్రంలో డిగ్రీ పట్టా అందుకున్నారు. తర్వాత ఉన్నత విద్య కోసం అమెరికా వెళ్లి, అక్కడి ఓహియో యూనివర్సిటీలో ‘ఫిజిక్స్‌ గ్రాడ్యుయేట్‌ ప్రోగ్రాం’లో చేరారు. 1976లో భౌతికశాస్త్రంలో పీహెచ్‌డీ పట్టా అందుకున్నారు.
తర్వాత ఆయన జీవశాస్త్రంలో పరిశోధనలు చేయాలని భావించారు. 1976-78 వరకు యూనివర్సిటీ ఆఫ్‌ కాలిఫోర్నియా, శాన్‌ డియాగో (యూసీఎస్‌డీ)లో మాలిక్యులర్‌ బయాలజీలో గ్రాడ్యేయేట్‌ స్థాయి అధ్యయనాలు ప్రారంభించారు.
1983-95 వరకు న్యూయార్క్‌లోని బ్రూక్‌హెవెన్‌ నేషనల్‌ ల్యాబొరేటరీలో బయోఫిజిసిస్ట్‌గా పనిచేశారు.
రైబోసోమ్‌పై మరింత ఉన్నత రిజల్యూషన్‌ అధ్యయనాలు చేసేందుకు 1999లో ఇంగ్లండ్‌లోని కేంబ్రిడ్జ్‌లో ఉన్న మెడికల్‌ రిసెర్చ్‌ కౌన్సిల్‌ (ఎంఆర్‌సీ) ల్యాబొరేటరీ ఆఫ్‌ మాలిక్యూలర్‌ బయాలజీకి వెళ్లారు. అదే సమయంలో ఆయన కేంబ్రిడ్జ్‌లోని ట్రినిటీ కాలేజీలో ఫెలో అయ్యారు. ప్రస్తుతం (2026, మే 2 నాటికి) ఆయన ఎంఆర్‌సీలో గ్రూప్‌ లీడర్‌ పదవిలో ఉన్నారు.

ముఖ్యమైన పరిశోధనలు..

1999లో ఆయన 30S రైబోసోమ్‌ సబ్‌యూనిట్‌ పరమాణు నిర్మాణాన్ని మ్యాపింగ్‌ చేశారు. ఇది చాలా కీలకమైంది. ఎందుకంటే ప్రోటీన్‌ సంశ్లేషణ సమయంలో రైబోసోమ్‌ల మెసెంజర్‌ ఆర్‌ఎన్‌ఏ (ఎంఆర్‌ఎన్‌ఏ), ట్రాన్స్‌ఫర్‌ ఆర్‌ఎన్‌ఏ (టీఆర్‌ఎన్‌ఏ)తో ఎలా సంకర్షణ చెందుతాయో వెల్లడించింది.
ఈ వివరణాత్మక మ్యాప్‌ రైబోసోమ్‌లు ఎంఆర్‌ఎన్‌ఏ, టీఆర్‌ఎన్‌ఏలకు ఎలా బంధితమవుతాయో అంతర్‌దృష్టులను (insights) అందించింది.

అవార్డులు - గౌరవాలు

2008లో ఇండియన్‌ నేషనల్‌ కాంగ్రెస్‌ సైన్స్‌ అకాడమీ (ఐఎన్‌ఎస్‌ఏ)కి విదేశీ ఫెలోగా ఎన్నికయ్యారు.
రైబోసోమ్‌ల నిర్మాణం, పనితీరుపై చేసిన అధ్యయనాలకు 2009లో రసాయనశాస్త్రంలో నోబెల్‌ బహుమతి అందుకున్నారు.
భారత ప్రభుత్వం 2010లో పద్మవిభూషణ్‌ పురస్కారంతో సత్కరించింది.
2015 నుంచి 2020 వరకు లండన్‌లోని రాయల్‌ సొసైటీకి అధ్యక్షుడిగా పనిచేశారు.

చివరగా..

విజ్ఞానశాస్త్రంలో వెంకీ రామకృష్ణన్‌ సాధించిన విజయాలు ప్రపంచవ్యాప్త గుర్తింపును తెచ్చాయి. ఇవి ఆయన్ను అణు జీవశాస్త్ర రంగంలో స్ఫూర్తిదాయక వ్యక్తిగా నిలబెట్టాయి. ఆయన పరిశోధనలు ప్రాథమిక జీవ ప్రక్రియలపై అవగాహన పెంపొందించడంలో సాయం చేశాయి. అంతేకాకుండా వైద్యం, ఔషధాల అభివృద్ధికి ఉపయోగపడుతూనే ఉన్నాయి.

గత పరీక్షల్లో అడిగిన ప్రశ్నలు

1. వెంకట్రామన్‌ రామకృష్ణన్‌ కింది ఏ రంగంలో చేసిన కృషికి నోబెల్‌ బహుమతి అందుకున్నారు
(ఎంపీ పోలీస్‌ కానిస్టేబుల్, 2016)

1) రసాయనశాస్త్రం 2) భౌతికశాస్త్రం

3) వైద్యశాస్త్రం 4) అర్థశాస్త్రం

సమాధానం: 1

2. భారత సంతతికి చెందిన కింది ఏ శాస్త్రవేత్త రాయల్‌ సొసైటీ అధ్యక్షుడిగా పనిచేశారు?
(యూపీఎస్సీ సీఏపీఎఫ్, 2016)

1) రొనాల్డ్‌ రాస్‌

2) హర్‌ గోవింద్‌ ఖొరానా

3) చంద్రశేఖర వెంకట రామన్‌

4) వెంకట్రామన్‌ రామకృష్ణ

సమాధానం: 4

3. రైబోసోమ్‌లు వేటితో నిర్మితమై ఉంటాయి?
(హెచ్‌టీఈటీ టీజీటీ సైన్స్, 2019)

1) డీఎన్‌ఏ, ఆర్‌ఎన్‌ఏ

2) ఆర్‌ఎన్‌ఏ, ప్రోటీన్‌

3) డీఎన్‌ఏ, ప్రోటీన్‌

4) ఆర్‌ఎన్‌ఏ, అమైనో ఆమ్లాలు

సమాధానం: 2

4. Venkatraman Ramakrishnan won the Nobel Prize in Chemistry in 2009. What is his primary field of research?
(RRB Group D 2018)
1) Quantum Physics 2) Structural Biology
3) Organic Synthesis 4) Astrophysics
Ans: 2
5. Which of the following statements are correct about Ribosomes?
Statement A: Ribosomes have no membrane.
Statement B: Digestive hydrolytic enzymes are present in Ribosomes.
Statement C: These are called suicidal bags.
Statement D: Ribosomes play an important role in protein synthesis.
(SSC MTS 2024)
1) Only statements A and D
2) Only statements A and B
3) Only statements A, B and C
4) Only statements A and C
Ans: 1