ఆల్బర్ట్ ఐన్‌స్టీన్

డాక్టర్‌ ఎల్లాప్రగడ సుబ్బారావు

డాక్టర్‌ ఎల్లాప్రగడ సుబ్బారావు భారతదేశానికి చెందిన ప్రముఖ జీవరసాయన (biochemist) శాస్త్రవేత్త. ఈయన శరీరధర్మశాస్త్రం, జీవరసాయనశాస్త్రం, వైద్యశాస్త్రాన్ని అనుసంధానించి అనేక ప్రయోగాలు నిర్వహించారు. ఈయన చేసిన పరిశోధనలు, ఆవిష్కరణలు ఆధునిక వైద్యం, ఔషధ రంగాల్లో విప్లవాత్మక మార్పులు తీసుకువచ్చాయి. కాలేజీ రోజుల్లో భారత స్వాతంత్య్రోద్యమంలోనూ చురుగ్గా పాల్గొన్నారు. కణంలో ప్రాథమిక శక్తి వనరుగా Adenosine triphosphate (ATP) పనితీరును గుర్తించారు. 20వ శతాబ్దపు అత్యంత గొప్ప శాస్త్రవేత్తల్లో ఒకరిగా పేరుగాంచిన డాక్టర్‌ ఎల్లాప్రగడ సుబ్బారావు జీవితంలోని ముఖ్య విశేషాల గురించి తెలుసుకుందాం..!

బాల్యం - వృత్తి జీవితం

ఈయన ఆంధ్రప్రదేశ్‌లోని భీమవరంలో 1895, జనవరి 12న జన్మించారు. ప్రాథమిక విద్యాభ్యాసం రాజమండ్రిలో జరిగింది. చదువుపై ఆసక్తి ఉన్నప్పటికీ పేదరికం, కుటుంబ సభ్యుల అనారోగ్యం కారణంగా ఆయన రెండుసార్లు మెట్రిక్యులేషన్‌ పరీక్ష తప్పారు. 1912లో మద్రాసులోని హిందూ ఉన్నత పాఠశాలలో చేరి, మూడోసారి పరీక్ష రాసి, ఉత్తీర్ణులయ్యారు. అప్పుడే ఆయన సరైన వైద్యం లేక ప్రాణాలు కోల్పోతున్న వారి కోసం ఏదైనా చేయాలని తపించారు. ఇందుకోసం వైద్య వృత్తిని ఎంచుకోవాలని నిర్ణయించుకున్నారు.
1915లో మద్రాస్‌లోని ప్రెసిడెన్సీ కాలేజీ నుంచి ఇంటర్మీడియట్‌ పాసయ్యారు. అదే ఏడాది మద్రాస్‌ మెడికల్‌ కాలేజీలో వైద్యవిద్యలో చేరారు. ఆ సమయంలో గాంధీజీ పిలుపుతో విదేశీ వస్త్ర బహిష్కరణలో పాల్గొన్నారు. ఖద్దరుతో తయారైన సర్జికల్‌ ఆప్రాన్‌ ధరించి కాలేజీకి వెళ్లినందుకు, సర్జరీ విభాగం ప్రొఫెసర్‌ ఎం.సి.బ్రాడ్‌ఫీల్డ్‌ ఆగ్రహానికి గురయ్యారు. ఆయన సుబ్బారావుకు ఎంబీబీఎస్‌ డిగ్రీ ఇవ్వకుండా అంతకంటే తక్కువదైన ఎంఎల్‌ఎస్‌ (లైసెన్సియేట్‌ ఇన్‌ మెడిసిన్‌ అండ్‌ సర్జరీ) సర్టిఫికెట్‌ ఇచ్చారు. దీంతో ఆయనకు వైద్య వృత్తి చేపట్టే అవకాశం దక్కలేదు. అయినప్పటికీ వైద్యశాస్త్రంపై ఉన్న ఇష్టంతో సుబ్బారావు మద్రాసులోని ఆయుర్వేద వైద్య కళాశాలలో అనాటమీ ప్రొఫెసర్‌గా చేరారు. దీన్ని డాక్టర్‌ ఆచంట లక్ష్మీపతి స్థాపించారు.
మానవాళిని కబళించే అనేక రోగాలను ఆయుర్వేదం ద్వారా నయం చేయొచ్చని ఆయన గుర్తించారు. ఆ రంగంలో అనేక పరిశోధనలు చేసి, ఆధునిక అవసరాలకు తగ్గట్లు దాన్ని తీర్చిదిద్దే ప్రయోగాలు నిర్వహించారు.
1923లో అమెరికాలోని హార్వర్డ్‌ స్కూల్‌ ఆఫ్‌ ట్రాపికల్‌ మెడిసిన్‌ కోర్సులో చేరేందుకు అమెరికా వెళ్లారు. అక్కడ ప్రముఖ జీవరసాయన శాస్త్రవేత్త డాక్టర్‌ సైరస్‌ ఫిస్కేతో కలిసి అనేక ప్రయోగాలు చేశారు.
1924లో ఆయన డిప్లొమా పొందారు. తర్వాత హార్వర్డ్‌ మెడికల్‌ స్కూల్‌లో జూనియర్‌ ఫ్యాకల్టీ సభ్యుడిగా నియమితులయ్యారు.

ముఖ్యమైన పరిశోధనలు - ఆవిష్కరణలు

1925లో డాక్టర్‌ సైరస్‌ ఫిస్కేతో కలిసి శరీర ద్రవాలు, కణజాలాల్లో భాస్వరాన్ని అంచనా వేసే ఫిస్కే - సుబ్బారావు పద్ధతిని అభివృద్ధి చేశారు.
1927లో కండరాల కణజాలంలో ఫాస్ఫోక్రియాటిన్‌ను కనుక్కున్నారు.
1929లో కణంలో ప్రాథమిక శక్తి వనరుగా ATP పనితీరును గుర్తించారు.
1943లో కాలేయ స్రవాల్లో ఫోలిక్‌ ఆమ్లాన్ని కనుక్కున్నారు. 1945లో శుద్ధి చేసిన, స్పటికాకార ఫోలిక్‌ ఆమ్ల రూపాన్ని ఆయన విజయవంతంగా సంశ్లేషించారు.

పొందిన గౌరవాలు

వైద్య, జీవరసాయన శాస్త్రాల అభివృద్ధికి ఎంతగానో కృషి చేసిన ఈయనకు నోబెల్‌ పురస్కారం దక్కలేదు.
సుబ్బారావు శత జయంతి సందర్భంగా భారత ప్రభుత్వం 1995లో ఆయన గౌరవార్థం స్మారక తపాలా బిళ్లను విడుదల చేసింది.
2024లో ఆంధ్రప్రదేశ్‌లోని ఏలూరులో ఉన్న ప్రభుత్వ వైద్యకళాశాలకు డాక్టర్‌ ఎల్లాప్రగడ సబ్బారావు గవర్నమెంట్‌ మెడికల్‌ కాలేజీ అని పేరు పెట్టారు.
ఆయన పేరు మీద ఒక శిలీంద్ర జాతికి సుబ్బారావుమైసెస్‌ స్ప్లెండెన్స్‌ అని పేరుపెట్టారు.
ఆయన జ్ఞాపకార్థం జంపింగ్‌ స్పైడర్‌జాతికి టాంజానియా ఎల్లాప్రడై అని పేరుపెట్టారు.

చివరగా

మనుషులకు సోకే అనేక రుగ్మతలకు ఆయన మందులు కనిపెట్టారు. మానవాళికి యాంటీ బయాటిక్స్‌ను అందించిన గొప్ప శాస్త్రవేత్తగా పేరొందారు. తన ఆవిష్కరణలు అందరికీ ఉపయోగపడాలనే ఉద్దేశంతో వాటికి పేటెంట్లు కూడా తీసుకోలేదు. ఆయన చేసిన పరిశోధనలు వైద్యశాస్త్రం, బయోకెమిస్ట్రీ అభివృద్ధికి నేటికీ ఉపయోగపడుతూనే ఉన్నాయి. ఈయన 1948, ఆగస్టు 8న మరణించారు.