జీజీహెచ్‌ వైద్యుల అరుదైన ఆవిష్కరణ

అత్యంత క్లిష్టమైన శస్త్ర చికిత్సలను సురక్షితంగా నిర్వహించడానికి గుంటూరు జీజీహెచ్‌ ప్లాస్టిక్‌ సర్జరీ విభాగం వైద్యులు ఓ వినూత్న పద్ధతిని ఆవిష్కరించారు. అంతర్జాతీయ వైద్య పరిశోధనా పత్రిక ‘స్ప్రింగర్‌ నేచర్‌’లో ఈ పరిశోధనా వ్యాసం ప్రచురితమైంది. గతంలో శస్త్రచికిత్సలు జరిగిన, తీవ్రమైన రేడియేషన్‌కు గురైన భాగాలు లేదా దీర్ఘకాలిక ఇన్ఫెక్షన్లు ఉన్న ప్రదేశాల్లో శరీర కణజాల నిర్మాణం పూర్తిగా మారిపోతుంది.

ఇలాంటి ‘హోస్టైల్‌ సర్జికల్‌ ఫీల్డ్స్‌లో శస్త్రచికిత్స చేయడం సర్జన్లకు సవాల్‌గా మారుతుంది. పాత గాయాల వల్ల ఏర్పడే కణజాల పొరలు, సున్నితమైన రక్తనాళాలు, నరాలు ఒకదానికొకటి గట్టిగా అతుక్కుపోతాయి. ఈ ప్రదేశాల్లో సాధారణ కత్తెర్లు లేదా పదునైన బ్లేడ్లు ఉపయోగిస్తే కీలకమైన రక్తనాళాలు తెగిపోయి తీవ్ర రక్తస్రావం జరిగే ప్రమాదం ఉంటుంది. ఎలక్ట్రోకాటరీ పరికరాలను ఉపయోగిస్తే కణజాలాలు కాలిన గాయాలకు గురయ్యే అవకాశం ఉంటుంది.