తాత తన ఆస్తిని పిల్లలకు పంచిన తర్వాత ఆ ఆస్తిపై సర్వహక్కులు వారికే లభిస్తాయని సుప్రీంకోర్టు పేర్కొంది. తండ్రికి అలా లభించిన ఆ ఆస్తిపై మనవడికి జన్మతఃహక్కు ఉండదని జస్టిస్ ఆగస్టీన్ జార్జ్ మసీహ్, జస్టిస్ సునీతా అగర్వాల్ల ధర్మాసనం 2026, నవంబరు 10న తీర్పు వెలువరించింది. హిందూ వారసత్వ చట్టం-1956లోని సెక్షన్ 8ని ఉటంకించింది. ఈ చట్టంలోని సెక్షన్ 6, 29(ఎ).. తాత ఆస్తిని కోరుతూ మనవడు దాఖలు చేసిన ప్రస్తుత వ్యాజ్యానికి వర్తించవని స్పష్టం చేసింది.
అవిభాజ్య హిందూ కుటుంబ ఆస్తులపై వీలునామా రాయకుండా యజమాని మరణించిన సందర్భాల్లో తలెత్తే వివాదాలు ప్రస్తుత వ్యాజ్యానికి భిన్నమైనవని అభిప్రాయపడింది. పిటిషనర్ కేసులో మద్రాస్ హైకోర్టు వెలువరించిన నిర్ణయంతో ఏకీభవించింది. తన తండ్రి విక్రయించిన ఆ ఆస్తిలో వాటా కావాలంటూ తల్లి సంరక్షణలో ఉన్న మైనర్ కుమారుడు దాఖలు చేసిన పిటిషన్ను తోసిపుచ్చింది.