వివిధ దేశాలతో భారత సైన్యం జరిపే ప్రధాన విన్యాసాలు

భారతదేశ త్రివిధ దళాలు వివిధ రకాల విన్యాసాలు నిర్వహిస్తుంటాయి. ఇవి యుద్ధ క్షేత్రంలో జరగని ఆర్మీ, నేవీ, ఎయిర్‌ఫోర్స్‌ సైనిక విన్యాసాలు. స్వదేశీ సాయుధ దళాల బలోపేతానికి, ఇతర దేశాలతో స్నేహ సంబంధాలు మెరుగుపరుచుకునే ఉద్దేశంతో వీటిని నిర్వహిస్తారు. ఇవి వివిధ మిలటరీ వ్యవస్థల సమన్వయానికి కూడా దోహదపడతాయి.

• భారత్‌ ఇతర దేశాలతో కలిసి నిర్వహించే వాటిని ద్వైపాక్షిక విన్యాసాలు అంటారు. భారత్‌ సహా వివిధ దేశాలు ఉమ్మడిగా పాల్గొని నిర్వహించేవి బహుపాక్షిక విన్యాసాలు.
• భారతదేశ ద్వైపాక్షిక, బహుపాక్షిక విన్యాసాలు వివిధ దేశాల యుద్ధ తంత్రాలను పరిశీలించడానికి, నూతన సాంకేతికతలను తెలుసుకోవడానికి ఉపయోగపడతాయి. ఆయా దేశాలు అనుసరిస్తున్న మెరుగైన యుద్ధ నైపుణ్యాల్లో సాయుధ దళ సిబ్బందికి శిక్షణ ఇచ్చేందుకు దోహదపడతాయి.
• విపత్తు సమయాల్లో సత్వర ప్రతిస్పందనకు, ఆయా సందర్భాల్లో పౌర సమాజంలో మానవ విలువలు పెంపొందించడానికి కూడా ఇవి తోడ్పడతాయి.