రైల్వేలో
టెక్నీషియన్స్

సన్నద్ధత వ్యూహాలు

• నోటిఫికేషన్‌లో సిలబస్‌ వివరాలు ఉన్నాయి. వాటిని గమనించాలి. అందులోని అంశాలే శ్రద్ధగా చదివితే సరిపోతుంది.
• విభాగాల వారీ ప్రాథమికాంశాల నుంచి సన్నద్ధత ప్రారంభించాలి. చదువుతున్నప్పుడే ముఖ్యాంశాలు నోట్సు రాసుకోవాలి. వీలైనన్ని మాదిరి ప్రశ్నలు సాధన చేయాలి.
• అన్ని అంశాలూ చదవడం పూర్తయిన తర్వాత గత ప్రశ్నాపత్రాలు పరిశీలించాలి. పరీక్ష కోణంలో ఆలోచించి ఏ అంశాలకు ప్రాధాన్యమివ్వాలో తెలుసుకుని, వాటిని మరోసారి బాగా చదివి, మాదిరి ప్రశ్నలు సాధన చేయాలి.
• అధ్యయనం పూర్తయిన తర్వాత మాక్‌ టెస్టులు రాసి, ఫలితాలు విశ్లేషించుకోవాలి. తప్పులు చేస్తోన్న అంశాలు మళ్లీ శ్రద్ధగా చదవాలి. ముందు పరీక్షల్లో చేసిన తప్పులు పునరావృతం కాకుండా, పరీక్షల వారీ స్కోరులో మెరుగుదల ఉండేలా సాధన చేయాలి.
• రుణాత్మక మార్కులు ఉన్నందున తెలియనివి వదిలేయాలి.
• ప్రతి ప్రశ్నకూ గరిష్ఠంగా 54 సెకన్లే ఉంటుంది. అందువల్ల బాగా తెలిసిన ప్రశ్నలే ముందు పూర్తి చేయాలి. సమాధానం గుర్తించడానికి ఎక్కువ సమయం తీసుకునేవాటిని చివరిలోనే ప్రయత్నించాలి.
• సన్నద్ధత కోసం ఏ పుస్తకాలు తీసుకున్నప్పటికీ పరీక్షలో పేర్కొన్న అంశాలకే పరిమితమై, వాటినే బాగా సాధన చేయాలి.
• మ్యాథమెటిక్స్‌ విభాగంలో ప్రశ్నలకు ఆబ్జెక్టివ్‌ అరిథ్‌మెటిక్‌ - ఆర్‌ఎస్‌ అగర్వాల్‌ పుస్తకం సరిపోతుంది. ఈ విభాగంలో త్రికోణమితి, ఆల్జీబ్రా.. తదితర అంశాల కోసం పదో తరగతి గణిత పుస్తకాన్ని బాగా చదివి, వీలైనన్ని ప్రశ్నలు సాధన చేయాలి.
• జనరల్‌ ఇంటెలిజెన్స్‌ అండ్‌ రీజనింగ్‌ విభాగానికీ ఆర్‌ఎస్‌ అగర్వాల్‌ రీజనింగ్‌ పుస్తకం లేదా మరోటి ఏదైనా తీసుకోవచ్చు.
• జనరల్‌ సైన్స్‌పై అధిక దృష్టి సారించాలి. వంద మార్కుల పరీక్షలో ఈ విభాగానికే 40 కేటాయించారు. విజయాన్ని నిర్ణయించడంలో ఇవే కీలకం. 8, 9, 10 తరగతుల భౌతిక, రసాయన, జీవశాస్త్రాల పుస్తకాలు క్షుణ్నంగా చదవాలి. పాఠ్యాంశాల చివరిలో ఉన్న ముఖ్యాంశాలన్నీ ప్రత్యేకంగా అధ్యయనం చేయాలి. అలాగే ఈ విభాగాల్లో ఏపీఆర్‌జేసీ, పాలిటెక్నిక్‌ పాత, మాదిరి ప్రశ్నలు బాగా చదివితే ఎక్కువ మార్కులు పొందడానికి అవకాశం ఏర్పడుతుంది.
• జనరల్‌ అవేర్‌నెస్‌ కోసం పత్రికలు చదువుతున్నప్పుడే ముఖ్యాంశాలు నోట్సు రాసుకోవాలి. సిలబస్‌లో పేర్కొన్న అంశాలకు చెందిన తాజా వార్తలకు ఎక్కువ ప్రాధాన్యం ఇవ్వాలి.